நாட்டுத் தேர்தலும் நாலாறு கோடியும்!

ஆட்டுக்கார அலமு முழங்குகிறாள்;
நாட்டுக்கொடி பறக்கும் கம்பத்தின் கீழ் நின்று!
அணியன்று பெரிதாக அமைத்திடுவோம் -அய்ந்தாறு பேர் போதும் ஆரம்பக் கட்டத்தில்!
அத்தனையும் நத்தைகளாய், சொத்தைகளாய்
அதுவே பழரசக் கிண்ணத்தில் பளபளக்கும் முத்துக்களாய்!
அவை தவிர நம்மிடம் அடிமை ஆட்டுக்குட்டிகள் தான்
தலையசைத்துத் தண்டனிட தாராளமாக உண்டே!
நானின்று நானிலத்தில் எதுவும் நடக்காது என்பேன்; என்
நா வசைந்தால் இந்த நாடே நடுங்கி ஆடுமென்பேன்.
அடிப்பதற்கு சாட்டை எடுத்தால் - அரசின்
அதிகாரிகள் கூட அடங்க வேண்டும்
அடியற்றிக் கை கூப்பிக் கிடக்க வேண்டும்
அல்லி ராணிக்கும் இல்லாத அதிகாரம் பெற்றவள் நான்;
அவை நடுவே ஆத்திரம் கொப்பளிக்க அன்றொருநாள்,
ஆவேச நடனம் ஆடியதை மறந்தீரோ அப்போதே!
இருந்தாலும் கூட;நான் அசையாமலே நான் வளர்க்கும் ஆட்டுக்குட்டிகள்நாட்டுத் தலைவர் தேர்தலில் அசைந்ததாக நானொரு பொய்யை
நாத் தழும்பேற நம்பும்படி சொல்லிவிட்டேன்
நம்புவோர் நம்பட்டும்; நம்பாதோர் நாசமாகப் போகட்டும்!
நமது நாட்டு வாக்காளர் நாலு காசு பார்க்கும் நேரம்
நல்ல தேர்தல் தினம்தானே?
நாட்டுத் தலைவர் தேர்தலிலே நான்
நாலாறு கோடி திரட்டியதும் அந்த விதம்தானே?

- தலைவர் கலைஞர்